السلام عليكم وعليا ..~.
اشحالكم ؟
ما بطول عليكم وببدى في السالفه هع

رحنا من فترة رحلة البر، ووقفنا في منطقة فيها محل لتأجير الدراجات، الصغارية نشبوا لنا يصرخون ويصيحون يبون يركبونها، وبعد جهد جهيد أهاليهم وافقوا بعد ساعات من النصح والإرشاد، على اعتبار أن الدراجات خطيرة ويمكن تنجلب بهم خاصة في صعدات ونزلات العراقيب.
المهم نحنا فرشنا أغراضنا وأولهم دلة الشاي والقهوة اللي تمت تطوف علينا واحد واحد، كان الجو هادي لين ما يت مجموعة سيايير سياحية (سفاري) مدحوبة أجانب منهم آسيويين، طبعاً مب مثلنا استأجروا الدراجات ساعتين وثلاث ودفعوا اللي دفعوه، لأنهم استأجروا دراجة وحدة ولمدة نص ساعة وكل واحد فيهم ساق مال خمس دقايق ورد الدراجة على ربيعه.
كنا نراقب الصغارية ونفاتن عليهم، كلما خلصت الساعة أطلبوا غيرها وفي النهاية نخضع وندفع عن الفضايح والحشرة، كلهم في صوب والآسيوي وربيعته في صوب اللي كانوا ضمن مجموعة السفاري، أول شي قام وردفها في الدراجة وهي تزاعج وتسوي حركات وتلوي عليه أونها زايغة. المهم قمنا نتطمش عليهم لأن حركاتهم استوت فلم هندي، وعقب ما نزلوا سووا فلم ثاني أمصخ عن الأولاني، وتمادوا وتحول الفلم إلى فرنسي حتى العيوز مالتنا بغت تهزبهم لكنا يودناها وهي تستغفر وتترحم على أيام زمان وتحاتي الصغارية عن يشوفون مع إنه كل واحد فيهم مسوي حوله غيمة من الغبار والرمل ولا هم مفتكرين بس يحاتون الساعة لا تخلص.
بذمتكم هذا مكان رومانسي يثيرهم، غبار ورياح ورمل وصدعة دراجات سايرة ورادة، ولا هي بس حركات جدام الناس؟ بس مو منهم، اللي يسوي عمره سبوس تلعب به الدياي. يعني لو كان في حكم رادع لهذي الممارسات، جان ارتدعوا ولكن يوم إنه أكبر الفضايح وأشهرها يصدر فيها حكم ما يتجاوز غرامة الألف درهم، وقتها كل واحد بيسوي اللي يباه وفي المكان اللي يباه.. والألف درهم مقدور عليها.