[[أنا يعجبني الرجل الاصيل الشهم عالي الشان]]

انا : المبرقعة

اضفني كصديق

السلام عليكم ورحمة الله وبركاته




أنا يعجبني الرجل الاصيل الشهم عالـي الشـان
عزيز النفس كسب الطيب عـاده مـا يخليهـا
واحب اللي بوقت اللازمه يصهل صهيل حصـان
وتعجبـنـي رياجـيـلٍ بعـيـداتٍ هقاويـهـا
واحب اللي ليا منه عـلا فـي جـوه الدخـان
يوردها حياض المـوت روحـه مـا يداريهـا
الا منه قعد سلطان والا منـه ركـب شيطـان
قوي الباس عرب الساس خيلـه مـا يعفيهـا
واحب اللي ستر وجهه شـراه بغالـي الاثمـان
الا من باعو الشيمه بغالـي الـروح يشريهـا
واحب اللي يخاف الله يجيك من العقـل رويـان
يشيـر بخيـر واهـل الخيـر للخيـره يدليهـا
واحب الشهم ممدوح السجايا صافـي الوجـدان
الا من جـوه ضيفانـه علـى نفسـه يبديهـا
واعز اللي يهلي بالضيـوف ويشعـل النيـران
وابي قولة هلا من قلب والعشيـات مـا ابيهـا
ابي الدله وابي الفنجال ابي الترحيب بالضيفـان
ابي جلسة نشامى راعـي المجلـس يقهويهـا
ابي لي سالفة عدله معاها من الشعـر قيفـان
تشدك حكمة الاجـداد يشـدك صـوت راويهـا
ابي النخوه وابي الفزعه واحب مجالس الشجعان
هل العادات والفزعـات نِعـم لا حـل طاريهـا
هل الشيمه هل القيمه هل المعروف والاحسـان
هل التقديـر والتأثيـر واللـي بيـض اياديهـا
واحب اللي ليا جـوه النشامـى يفتـح البيبـان
كريمٍ من قديـم الوقـت ليـا صكـت لياليهـا
احب المرجلـه واصحابهـا واقـدر الفرسـان
بخيصٍ فـي معانيهـا قبـل لبحـث خوافيهـا
واعرف اللي يخوض المعركه لا صار بالميـدان
يمشيهـا علـى رايـه وياخذهـا ويعطيـهـا
واحب اللي سوالفهم ذهب مـوزون بالميـزان
مهـو خبـلٍ يخـم السالفـة بعديـن يخطيهـا
واحب اللي رفع نفسه وجنبه مجلس الحقـران
حشيمٍ ما لقـى حشمـه تركهـا مـا يدانيهـا
عرف نفسه لزم حـده ولا هايـن ولا ينهـان
الى مـن زادت اللجـه يجنـب عـن بلاويهـا
واحب من الرجال اللي يسمى شمعـة الديـوان
الا منـه تـحـدث كــل كلمـاتـه ينقيـهـا
ولا احـب اللئيـم اللـي تصيـد زلـةٍ بلسـان
الى منـه سمـع زلـة رفيقـه مـا يغطيهـا
واحب اللي ليا سوى غلط قال العفـو غلطـان
حلاة الرجل لا منـه جـرح روحـن يداويهـا
ترى اللي يشد في رايه على طول المدى خسران
يضيـع ولا يطيـع ولا بغاهـا مـا يلاقيـهـا